鷹君（041）疑似爭產風波仍在發酵，曾表明自己分得少，有資格講公道說話嘅羅家四公子羅康瑞，噚日以貿發局主席身份出席活動，自然成為追訪對象，不過佢今次好口密，只係搖搖頭形容事件係「悲劇」，唔肯再講家事，只講自己pat pat!

羅康瑞作為風波主角之一，噚日現身只為宣傳「一帶一路」，傳媒追問家事，佢多次拒絕，最尾先至用好沉重嘅語氣話係「悲劇，我只能講悲劇，我相信公道自在人心」，又叫大家唔使再問再等佢。

雖然唔肯講家事，但羅康瑞就自爆，一年半前，因為髖骨磨損，晚晚瞓覺壓住都痛，最終做咗髖骨置換手術。手術後，由於pat pat至大髀附近無郁好耐，導致肌肉收縮，佢諗住鍛鍊番啲肌肉，點知又唔小心拉傷咗，早前仲要用拐杖行路，近排先至正常行得番。

呢件事令華華諗番起羅老太，聽講羅老太本身都行得走得，因早幾個月前跌傷咗，所以家陣先至坐輪椅出入。

雖然羅康瑞做過手術，但為咗生意都要周圍飛，好似上周五（16日）佢同三哥羅嘉瑞、五哥羅鷹瑞就分別因公幹同睇症冇參加家庭會議。

據講，佢哋有建議其他日子，但不獲所有人回覆先唔成事。問佢仲飛唔飛？佢只話「呢個星期唔走住。」唔知呢個星期有冇家庭會議。

掌握財經生活資訊，即Like「蘋果ATM」fb專頁啦！
http://fb.com/appledailyatm