上次夜馬尾場「綫路勇駒」同「與龍共舞」出閘同時起擒，賽後好多馬迷對「綫路勇駒」係咪公平出閘有保留，質疑司閘助理員開閘時有捉住隻馬，批評馬會唔回水唔公道。雖然競賽小組喺研訊後認為慢閘完全係馬嘅問題，但唔少馬迷嘅觀感始終係馬會有殺錯冇放過。

一直都話凡有馬賽前走甩、衝閘或者疑似不公平出閘情況，喺維護投注人利益下，馬會最好要求相關馬匹退出，或判為非出賽馬，呢個係將爭議同影響減到最少嘅做法。事實退出一隻馬，回水都唔係大數目，偏偏由受薪董事祁禮謙為首的競賽小組堅持佢哋嘅判斷就係真理，難怪公眾有反感，認定馬會睇錢大過天，一味賺到盡。

唔知點解，香港跑馬好似特別多出閘事故，馬迷睇得越洋賽事多，都有發覺其他賽馬地區安排馬匹入閘，都比香港更快更有效率。平心而論，馬會真係應該效法吓人哋，點樣喺拖馬入閘方面做得更好，家陣畀人感覺成日慢條斯理、拖慢等多啲投注咁，其實對早入閘嘅馬唔多公平，好多馬漏閘就係因為喺閘廂企得太耐，何況唔見得拖慢入閘，對投注額有好大幫助，要投注嘅人真係等到開閘前一刻先落飛？

過年後打疊三次賽事都加場，但上次夜馬同今日都有冷場嘅高班賽事，其實馬會明知跑到季中，好多高班馬都部署晒去跑大賽，預咗普通賽事唔夠馬報名，編場人員冇理由唔知道情況，仲係唔執生變通。

一時就將報名馬拆組變兩場，一時又夾硬編多場得幾隻馬嘅高班賽，感覺就係為加場而加場，總之賺到盡。現時馬季賽期已經係馬不停蹄，點樣編場同加場，馬會真係應該適度調節。

阿Joe