當年今日
關於我們

蘭西情報課:中資買南洋中心長揸

蘋果日報 2006/05/27 00:00


呢排寫字樓市道旺到不得了,啱啱恒生先話承租九龍灣企業廣場,之後就有中資又嚟九龍區入貨。
美聯李鎮龍話,最近促成單交易,係中資集團用8071萬,連租約買入尖東麼地道75號南洋中心2座10樓全層,樓面有1.45萬方呎,呎價係5566。𠵱家月租21.8萬,租期至明年中屆滿。
據聞財團會作中、長線投資,過去佢哋都有買本港商廈,今年入貨態度幾積極。由於尖東甲級商廈呎價只係五千幾,相比中區部份商廈已經突破一萬大關,仍然算係低水,所以就去馬。
個單位嘅原業主係喺04年中用呎價3000買入,揸咗大約兩年,賺3700零萬。聽聞今次獲利後有可能喺市場搵啲全幢物業或者地皮玩吓,睇嚟市場仍然不愁冇搞作。
仲有,先前講過恒生公布會遷入九龍灣企業廣場5期第2座,嗰區馬上又有新成交出現。中原李婉琪話,企業廣場3期30樓03室全海景單位,近日有用家向發展商嘉里買入,面積2285方呎,成交價1314萬,呎價5750蚊,係呢幢物業嘅新高。上次高位係同層02室,呎價5737蚊。由於呢幢物業查詢個案唔少,估計年底呎價可能再升一成到一成半。
電郵地址:[email protected]
empty
empty
企業廣場3期30樓2285方呎單位,以呎價5750蚊新高成交。