由金智媛同朴敘俊主演嘅KBS韓劇《三流之路》噚晚播出第九集，上集《三流之路》收視不敵同檔由周元及吳漣序主演嘅《我的野蠻女友》，不過噚晚一集《三流之路》就收復失地，金智媛同朴敘俊呢對青梅竹馬嘅好朋友，兩人因為要喺賓館過夜，因為朴敘俊驚曱甴，所以就跑到金智媛間房，兩人飲酒談心，之後仲一齊攬住瞓，似乎兩人嘅友情開始發展微妙嘅變化。

而噚晚一集《三流之路》更急升2.3%，更錄得12.1%嘅收視，成為開播以來最高一集嘅收視，同時亦重奪月火劇(逢周一及周二播出)嘅收視冠軍寶座，至於《我的野蠻女友》噚晚播出第13及第14集，收視分別為8.1%及9.3%，排同檔第二名，李詩英、金英光主演嘅《守望者》第17及第18集分別為7.2%及7.7%收視，包尾墊底。