香港人對著陌生人唔鍾意笑，係唔少外國人對香港嘅印象。今年年初更加有調查話香港喺全球最不快樂國家或地區排第7位。（相關報道： https://bit.ly/2tkJ38X ）有KOL就嘗試實測，睇下香港有究竟有幾「唔快樂」。

KOL托哥（Torres）早前就喺港鐵拍咗條片，片入面托哥一劈頭就大聲問車廂入面嘅乘客，「香港人，我哋開心啲好唔好？」當然，乘客除咗望咗佢一眼，係無反應。之後托哥就高歌一曲《世界真細小》。「人人常歡笑不要眼淚掉，時時懷希望」，又係鴉雀無聲。托哥於是轉Channel唱英文歌《If You're Happy And You Know It》，「If You're Happy And You Know It. Clap Your Hands.」（如果你快樂，和你知道，拍你雙手）所謂「自古成功在嘗試」，竟然有位仁兄響應，拍咗兩下手掌。

《蘋果》就打過畀托哥問，托哥話當時正值下晝放工時間，見乘客好多都愁眉苦面「死老竇」咁，一啲聲都無，於是想「搞下氣氛」，令到乘客可以放懷開心下。托哥話今次主要想撩下乘客笑下咁，想發放下正能量咁話。對於最後有人拍手佢都好開心，佢話嗰個拍手乘客係外國人，又話佢知道香港人其實外表冷漠，內心一定好想跟著唱，佢話睇下條片上載一日就有20幾萬觀看，就知香港人內心幾咁澎湃。

托哥最後被問到有網民留言話佢「痴線佬」佢點睇，佢就回應話，希望拍多啲呢類片，令話佢痴線嘅人都會接落去，跟著一齊唱。

網民留言

Yan Mak：笑死，個道個個人一定心諗：香港又多左個痴線佬
Bonita Lau：其實紅衫個姐姐有笑左嫁，你其實好成功嫁！！！！
Kay Lai：香港人開心啲好無
Kit Sita：正!! 香港多d正能量好!!
Sui-hei Tam：以為你有病呀！
Chu Shing Leung：有咁上下年紀嗰啲點會同你玩
Kayan Chan：尷尬癌..好搞笑..但同時又覺香港人好cool...