由韓片《V.I.P》男星金明民、女團Girl’s Day成員惠利、韓片《屍殺列車》男星崔宇植及韓劇《回來吧大叔》男星金仁權主演嘅新片《惡獸》，係韓國首部怪獸動作史詩動作片，電影日前舉行首映禮，唔止一眾主演有出席，SHINee成員Key及珉豪、Girls’s Day成員Yura、男星郭時暘等亦有現身撐場。

電影噚日喺韓國開畫立即成為票房冠軍，同時電影亦將於下月4日喺香港上映，電影公司今日公開多張港版海報，令觀眾都相當期待。

《惡獸》中唯一女主角惠利自然受到關注，加上電影係佢嘅大銀幕出道作品，所以惠利都坦言好緊張。片中有唔少動作場面，惠利都親身上陣拍攝，更於電影開拍前，特地接受兩個月嘅武術訓練，獲金明民大讚佢態度專業。對於首度拍攝電影，惠利亦表示與係新挑戰，與拍劇好唔同：「拍電視劇幾乎冇得瞓，一收到劇本就要立即記台詞及投入拍攝，但拍電影時間就會比較充裕及自在。」

另外，《惡獸》入選西班牙錫切斯國際電影節（Sitges Film Festival）嘅兩個競賽獎項，包括「Panorama Award」（Panorama單元最佳電影）及「Focus Àsia Award」（所有單元最佳亞洲電影），電影似乎有望揚名海外。

精選韓流，喺晒《娛果》
http://fb.com/appledailyent