麥當娜今晚殺入亞博館舉行演唱會，開場前場外已經非常熱鬧，有歌迷扮鬼扮馬cosplay前往朝聖。YorgoLand同女伴ZoomcgerryIbiza來自比利時，身為歌手嘅YorgoLand唔係第一次睇娜姐，之前已經跟住娜姐嘅巡迴騷四圍飛，去過歐洲、美國、日本同埋今次嘅香港，佢話：「今次一身造型整就好快，但諗就諗咗成3個月！」

Alexander以李小龍造型到場：「李小龍代表香港人，我係麥當娜bigfans，之前都睇過幾次。我買咗風褸同埋帽，期望佢今次可以講多啲廣東話，希望佢鍾意香港，玩得開心啲。」

余安安就約埋朋友睇騷，對於娜姐例遲，佢笑言希望今次唔好遲咁多，仲自爆10年前本來有機會睇，但後來因為有其他嘢做冇睇而好遺憾。問佢睇一場夠？佢話：「夠，好嘢一場就夠！」