反送中惡法令大家勾起唔少抗爭回憶，遠嘅去到2003年7.1，近啲係五年前嘅佔領，警方派出嘅發言人，原來同樣可以令人記憶猶新，講緊嘅係喺612前，警方派出港島總區高級警司吳樂俊開記招，同大家講吓警力部署，記招後，網上即時熱傳番呢位有「警隊黎明」之稱阿sir嘅「威水史」。

有份飛擒黃之鋒

吳sir身形健碩、高大威猛，但原來早年曾經捲入過同志富商「劉公子」劉定成裸照勒索案。吳sir當年喺快餐店偶遇劉公子，被游說拍攝時裝廣告，一時不虞有詐盛情難卻之下，去咗對方屋企除衫兼擺出唔同甫士，無償拍落展示充滿夏日氣息嘅上身裸照。劉公子自上世紀70年代起專集肌男照，聽講唔少男藝人同肌肉警都被佢影過相，佢仲會喺相度寫低唔同人嘅名同下體尺寸、警員編號資料。

當年事發後，報道話吳樂俊本來係警隊明日之星，仲話佢之後恐怕升職無望，但後來佢洗底成功，幾年前佔領清場嗰陣，就曾經有份喺旺角飛擒黃之鋒，然後之鋒就投訴當時俾警員六、七次企圖傷害佢下體，咁當然最後警察嘅跟進不了了之啦。睇番當時吳樂俊，原來只係警司，家陣睇嚟又升咗職啦！

李八方