劉青雲、梁詠琪、李司棋、姜大偉同李琳琳，仲有陳曦齡帶埋個仔同新抱，前晚喺會展欣賞《魔法小葫蘆》首映。青雲話佢班老友好多都有仔女，問佢幾時生番個，佢就話會考慮吓，又話返去問吓老婆郭藹明先，因為佢屋企冇小朋友，未同細路仔相處過，唔知自己鍾唔鍾意。不過青雲老友黃秋生有老婆又有仔，仲拖住模特兒女友張詩敏（Jessie）周街行，青雲話：「係咩？我唔知呀，好少八卦呢啲嘢，唔好跟佢咁多啦，佢帶壞人㗎。」對於秋生否認同老婆離婚，青雲就話：「佢否認呀，咁咪否認囉！」

讚曹永廉好女婿

已移民加拿大嘅李琳琳最近返咗香港，前晚同埋老公姜大偉同個仔去睇戲，講開佢哋個女姜依蘭將會喺11月嫁曹永廉，李琳琳話：「日子未定，香港搵地方擺酒唔易，我都等通知。」李琳琳大讚曹永廉好錫佢個女，打牌又肯鬆章畀佢，係個冇得頂嘅女婿。
問到係咪專程返港探老友肥姐，姜大偉搶答：「我太太返嚟梗係探我。」不過佢哋前幾日有同肥姐食飯，姜大偉話：「見佢健康比之前好，又好開心，佢好為食，大家叫佢食少啲，要戒口，佢個女同朋友睇住佢囉。」姜大偉話自己回流返香港，兩個女又喺香港，遲啲李琳琳會帶埋個仔返嚟，加拿大嘅物業放緊盤，到時會正式回流返港。