洪天明、周家蔚、曹永廉、唐文龍及劉永健共同創辦投資8位數字嘅網上購物平台「香蔓蕾」，噚日喺澳門舉行「2016璀璨星匯．澳門站」頒獎禮，出席嘉賓包括意大利足球名宿巴治奧（Roberto Baggio）、洪金寶、李克勤、鄭嘉穎、苗僑偉、黎耀祥、吳卓曦、陳國邦等。
曹永廉話想同黎耀祥、黃浩然、吳卓曦、陳國邦幾兄弟一齊搞生意。至於離巢無綫嘅陳國邦，就話嚟緊會喺浸會大學教書。鄭嘉穎亦正式離開無綫，佢話：「16年嚟冇試過以唔係TVB藝人嘅身份出席活動。」講到之前傳佢同陳凱琳分手，報道中嘅第三者係造型師朋友，嘉穎笑話：「新加坡朋友係鬼鬼哋，我會唔准個男仔叫佢做baby。」

巴治奧傾香水生意

首次到澳門嘅巴治奧，因為英語麻麻，全程由經理人代答，巴治奧做緊香水生意，今次嚟到澳門會傾吓生意，亦會關注中國巿場，同時想放多啲時間培育年輕足球員。
巴治奧前晚去咗澳門嘅「左麟右李」餐廳食雲吞麵，但老闆李克勤同譚詠麟都唔得閒，克勤話：「94年世界盃，我喺現場親眼睇佢射失12碼，真係好傷心，見面會時我會問佢啲雲吞麵好唔好食，畀佢一世免費都冇所謂。佢係除咗曼聯球員之外，我鍾意嘅技術型球員。」
撰文：馮仁昭