老兵打不死|37歲李康廉仲當fit 冀以身教助年青球員

蘋果日報 2021/06/23 16:31

李康廉亞協盃港超聯

年齡只是數字,心態更加重要。近年有不少新星一閃即逝,同時亦有老將越戰越勇,包括9月將滿38歲的李康廉。正助理文出戰亞協盃的他今季仍是港超聯最好的翼鋒之一,仍想繼續在球場征戰,為年青球員作最好的身教。
記者/攝影:禤家民
empty
李康廉,37歲,理文翼鋒。
創會僅4年的理文首戰亞協盃,陣中不少球員有豐富亞洲賽經驗,李康廉是其一,曾代表天水圍飛馬及南華出賽,那時初戰亞洲舞台,康廉相當興奮,「特別係第一次,天水圍飛馬嗰時,同依家好大分別,以前真係會去作客,對泰國、越南、緬甸、印尼,以前覺得好新鮮,代表緊香港出去踢波。」可惜疫惰下世界大變,今年亞協盃雖然可復辦,但分組賽改以賽會制的單循環,而且早前賽事改制,兩支香港代表一定處於同組,與其他地方的球隊交流機會減少。
empty
2011年,李康廉效力天水圍飛馬時已出戰亞協盃。
儘管如此,球員們仍肩負帶香港足球衝出亞洲的重任。理文這支年輕的球隊,除了有主教練陳曉明掌舵,還有李康廉等老將。時至今日,球圈中人仍說李康廉是港超聯其中一位速度最高的球員,20歲才接受正規訓練的他,能在37歲之齡仍可保持良好體能,有賴良好的紀律,「我好早期已經有注重飲食,我覺得可以keep到都好大幫助,同埋心態,究竟你想唔想去做呢樣嘢呢?」他說,在香港很難完全做到每餐都吃正確的食物,只能盡量避免,「我會盡量食意粉,三文魚、吞拿魚、雞蛋嗰啲。」多年來注重飲食,加上年紀漸長,其他方面也有改變,「早啲休息,訓練量都會提高少少,做完GYM自己會加啲力量訓練,因為我哋肌肉流失得較快。」
empty
注重飲食的李康廉今季仍有傑出表現。
除了紀律好,康廉慶幸職業生涯沒有大傷(touchwood),「都有傷過,但我唔會畀自己沉落去,靠意志,一定要踢翻起。」靠自律和鬥心,37歲的李康廉在球場上,好像與20歲的李康廉沒有太大分別,但細節上還是有點不同,「以前啲波好幼嫩,踢得耐啲會知道,有啲波應該喺邊個位出現。」康廉正正想把這樣球場上的經驗,傳授予年青球員,他也希望掛靴後擔任教練,加盟理文,或多或少因為想在大埔初升班時合作過的陳曉明身上學習,「以前佢教我,我冇乜點諗,啲訓練係做咩,但依家佢每set一個訓練,我都會諗佢想做乜嘢,所以從而我會理解到佢想點踢法。」
empty
康廉32次代表港足上陣,曾與中村俊輔交手。
縱使已手執B級教練牌,康廉認為自己仍未是時候掛靴做教練,因為他覺得,在場上對小將的幫助更大,「年青球員落到場,可能唔知應該邊個位出現,幾時走,好難講。我哋一齊落場感受去踢時,可以當場話佢聽,進步得比較快。」當年青球員見到37歲的老將仍然每日刻苦操練,可能比吸收任何足球知識更為重要,廉廉說:「我係會繼續去學習,繼續去操自己,練自己,不斷練到最好,我唔會覺得我落到場係輸畀你哋,後生嘅見到時,咪可能有個心態繼續去學習,因為見你仲可以踢到,仲係咁快。可以推動到佢哋繼續努力,好多嘢唔係得個講字,都要去做。」
empty
李康廉有意向教練方向發展,但仍想繼續踢下去。
empty
於沙頭角長大的李康廉受陳平邀請加盟大埔,之後升上甲組,成為一時佳話。
訪問中康廉講得最多的,是要幫年青球員成長,「就算我唔踢,我都會做教練,我都係想幫香港足球,回饋返香港足球。未來帶職業隊定係青年軍都好,冇乜所謂,只要幫到佢哋就得。」康廉想回饋香港足球,更沒有忘記把他帶到職業足球的人,「我以前一直冇踢過職業隊,由丙組上乙組,再上甲組,多謝陳平,冇佢就冇我今日。」
empty
-----------------------------
蘋果App大升級 更簡潔更就手!了解更多立即下載體驗
-----------------------------
《體蘋果》陪你睇波講波