樓市透明度提高，作價變動幅度收窄，但間中仍會出現超高或超低價，屯門邁亞美海灣就有一宗勁平成交，比市價足足低兩成。
呢個四座低層D，近七百呎，一百萬有找，僅九十九萬五千，每呎一千四百三。蘭西翻查資料，發現個價係今年第二低，對上一宗喺一月，五座B每呎一千三百九。呢個低層D一直收租，最近約滿放售，業主見單位質素與裝修都麻麻，估計買家要貼錢翻新，所以肯平啲賣。而且佢喺九龍搵到心水住宅，都需要套現。
買家見呢個係向海最大兩房戶，業主又將開價由百二萬降低，於是嘗試還價。最初還九十萬，估唔第二口價九十九萬五，業主已經肯賣。

趙世曾借助古玩賣樓
趙世曾近排頻頻露面，介紹卓能山頂施勳道30號C獨立屋紫薇居，噚日親自帶傳媒參觀。三層高獨立屋連戶外泳池成五千五百呎。
講到室內裝潢，趙世曾話，相對薄扶林趙苑，紫薇居較有古典味，因為間屋放置好多古玩同名畫，例如明朝掛畫。屋內重有幅係唐伯虎真迹。部份擺設，係趙世曾媽咪親自揀選，收藏超過二十年。不過買家要留意，啲古玩同名畫，唔係隨屋附送。
負責招標嘅中原何兆棠話，現有二、三十宗查詢，包括東南亞基金及內地資金。至於趙苑A1洋房，下周招標。

港島熱盤太古城稱冠
樓市暢旺，十月份共有七千一百五十三宗二手住宅買賣註冊，比九月增加兩成，係近六個月新高。
註冊量最多嘅二十個屋苑，有四個超過一百宗。最多係荔枝角美孚新邨嘅一百二十九宗；美孚頭十個月註冊量重超過一千宗，係九七年以來第一次。增幅最大係鰂魚涌太古城（圖四），增加一點四倍，共一百零一宗，其餘為沙田第一城及天水圍嘉湖山莊。十月整體樓宇買賣註冊量，係一萬零八百四十二宗，比九月增加近兩成一，連續第二個月增加。
美記劉嘉輝話，十月因為賣地理想，二手住宅提高叫價，令買賣減少，尚幸一手盤相繼開賣，因此預料本月註冊可以多過一萬宗。