勢估唔到，平時畀人印象好勇鬥狠嘅伊朗，佢哋嘅球迷會如此熱情；歐洲出名會搞氣氛嘅葡萄牙球迷，都唔及伊朗球迷玩得開心、叫得興奮。
伊朗畀人感覺係較為神秘，特別係當地嘅女士；但今次世界盃，佢哋好似拋開所有包袱，盡情享受賽事每一分每一秒。伊朗女球迷更加係熱情奔放，全程打扮性感，更不時同其他球迷擁抱合照；之前真係無諗過，仲以為佢哋仍然係黑布蒙頭咁去睇波。

球迷不滿戴伊任正選

有線直擊隊同好幾個伊朗球迷傾過，佢哋雖然好鍾意國家隊，但係就唔係咁認同教練嘅排陣，尤其用戴伊打正選，簡直係侮辱國民嘅智慧。佢哋話戴伊年紀咁大，功用應該係作為替補前鋒，好似以前喀麥隆老將米拿咁，後備上陣幫國家隊建奇功。
至於沙地阿拉伯嘅老將艾查巴就係另一例子，佢上場對突尼西亞以後備身份出場，就用一個入球證明佢自己仍有能力之餘，又證明教練嘅調動正確；沙地最後雖然和波，但球隊上下士氣俱佳，下一場對烏克蘭又打高一皮波。
果然，伊朗今場淨吞葡萄牙兩隻光蛋，散場時伊朗球迷失望嘅表現清楚可見，與振臂歡呼嘅葡萄牙球迷成強烈對比。伊朗2戰2敗，晉級16強已經無望，下場對非洲代表安哥拉雖然無關痛癢；但有呢班咁支持球隊嘅捧場客，希望伊朗可以打好啲，贏番場波當安慰，兼為亞洲球隊爭光啦。
有線06世界盃嘉年華，將於今晚7:00pm——9:00pm，播出世盃外景隊採訪滙報