韓劇《瑪麗外宿中》女星金孝真，去年7月幫電影《上帝的男高音》男星劉智泰生B後減少曝光主力湊仔，唔講唔知，原來佢同搖滾教父徐太志嘅老婆李恩星好老友，經常帶囝囝同李恩星個女玩。

近日金孝真公開咗呢對星二代小朋友一齊玩嘅相，仲講笑咁介紹李恩星個女係囝囝嘅女朋友仔，「佢哋玩得好開心，恩星個女真係好得意，年齡相差兩個月左右嘅朋友仔。」

不過金孝真就貫徹低調作風，冇公開囝囝同李恩星囡囡嘅正面樣，只係見到佢哋趴喺度玩，李恩星個囡囡仲戴住蝴蝶結，皮膚白白。而徐太志之前曾經公開囡囡嘅相，對比起今次真係大個咗好多。