今時今日承認自己係港英餘孽，確係不識時務，但費清不認不認還須認。（利申，費清中小學讀官校，之後又讀港大，深受殖民政府荼毒，冇得救㗎喇。）

噚日就嚐到久違了嘅味道，因為幫襯咗開業兩三日嘅TheRoyalTouchBakeryCafé。呢間係TheRoyalTouch首家品牌餐廳，創辦人CarolynRobb曾擔任英國王儲查理斯王子及戴安娜王妃御廚超過10年。餐廳除咗賣英式西餅、英式杯子蛋糕（FairyCake）、朱古力及英式皇室下午茶等，仲有午餐，意大利粉、炒飯八十幾蚊，牛扒就大約一百四十幾蚊，唔算太貴。

費清最鍾意係手造皇室朱古力脆餅蛋糕（TheRoyalChocolateBiscuitCake），威廉王子由細食到大，2011年與凱特大婚時仲指定做結婚蛋糕。據講，當時用咗一千七百塊餅乾，同四十磅朱古力。外形睇落去似brownie，但咬落去有消化餅、果仁、果肉，加埋濃濃朱古力味，應該配番杯EarlGrey。

喺海港城海運大廈呢間英式餐廳，食啖英式甜品，見到香港依家變成咁，真係既懷念又感慨；當年我哋有肥彭細女，今日有特首二女。不解釋。