【新增T.O.P離開法院內容及圖片】
韓國天團BIGBANG嘅29歲成員T.O.P，本月初被爆去年10月喺自己屋企吸食大麻，及後接受警方調查並遭檢方不拘留起訴，早前T.O.P被調識到第4機動隊，佢疑因壓力過大，喺服役單位內服食過量藥物，陷入昏迷而留醫ICU，幸好T.O.P之後恢復意識，日前亦已離開ICU轉到其他醫院接受精神方面嘅治療。

香港時間今日10時30分，T.O.P吸食大麻案就喺首爾中央地方法院刑事8單獨庭進行一審，審訊設有旁聽，於香港時間今早8時40分左右旁聽許可證已經派發完畢，法院方面冇透露派發咗幾多張許可證，僅表示冇許可證嘅人唔能夠進入法院旁聽。

約香港時間10時28分，T.O.P身穿黑色西裝，冇戴口罩及神情嚴肅地現身，並90度鞠躬致歉，表示：「過去嘅日子我深深為今次嘅失誤進行反省，我太愚蠢，真心向呢段時間因為我錯誤嘅行為而令受困擾嘅人、對我感到失望嘅人道歉，無論咩刑罰都會接受，並承諾今後唔會再發生呢啲事。」

現時案件正在審訊中，當中因T.O.P承認吸食大麻，檢方要求判10個月有期徒刑，緩刑兩年，以及1萬2千韓圜（約81港元）嘅罰款，最終判決喺7月20號進行。

而T.O.P大約喺法庭逗留一小時多就離開，當佢離開法院時，沿途有唔少傳媒即爭住採訪，不過T.O.P就未有停下來受訪，急步上車離開。