上期（20日）谷草夜馬莫雷拉與方嘉柏合作四駒，成為當晚焦點，點知道「雷聲大、雨點小」，只得「騏名燈」入Q。

莫雷拉昨天（26日）34歲牛一，方仔會唔會打孖送禮俾佢，就要睇吓今晚頭場「明昇」同第四場「隨時候命」生唔生命咯。

「隨時候命」上場熱身後，雷神肯唔放手繼續騎，但「明昇」從未近過，竟獲雷神垂青，背後原來有個小故事。

幾乎每次賽事都場場卜滿座騎嘅莫雷拉，原本今期只搵到七駒跑，頭場冇佢份，惟上星期四（21日）報名公佈後，方仔好快就收到風，知道雷神呢場冇馬騎，咁啱自己正為「明昇」騎師人選張羅，於是問對方肯唔肯騎，答案結果係yes。

莫雷拉一向勤力，而且絕唔會放過任何出賽機會，鍾意自己落場多過做觀眾，雖然四歲的「明昇」至今跑咗兩場都冇表現，但有得上陣就代表有機會贏，即管睇吓「明昇」初戰谷草兼首配雷神，會唔會來個大變身。