皇家馬德里今季學足熱刺咁，開季初段已經同隊內球員傾續約，最新一位就係「BBC」之一嘅賓施馬，同球會續下四年新約，留守班拿貝至2021年。

皇馬喺官網公佈消息，話賓施馬會喺星期四正式出席記者會，動筆同球會續約；雖然細節就冇點透露，但西媒就話佢年薪將上升至750萬歐元，毀約金更高達10億歐元（約93億港元），仲誇過前兩個禮拜續約嘅艾斯高，後者毀約金亦高達七億。

賓施馬2009年由里昂過檔，唔聲唔聲原來都效力咗皇馬近10年，上陣已經達374場，幫球隊攞咗大大細細14項錦標。

皇馬已經先後同馬些路、艾斯高、丹尼爾卡華積及賓施馬續約，就好似去年熱刺咁，季初早早已經同迪利阿里及基斯甸艾歷臣等主力傾掂數，等球員可以專心一致，應付今個球季啲挑戰。