意大利籍騎師沈拿本月初由卡塔爾飛嚟香港發展，頭六個賽日只憑「烽煙四喜」入Q，好多人都唔太睇好佢，直至上期大發神威，先以「包勝」開齋，之後贏埋尾場「加州再豫」起孖，再冇人懷疑佢嘅騎功。

呢兩場頭馬真係沈拿嘅及時雨，佢話呢三個星期非常難捱，一方面要盡快適應香港馬圈，盡力爭取支持，另一方面只得自己一個人生活，有時都覺得好寂寞，慶幸難捱日子已告一段落，太太同一對仔女平安夜飛抵香港，之後一家人喺聖誕節去尖沙嘴某五星級酒店食大餐，全家齊齊整整歡度佳節，肯定係最窩心嘅禮物。

今晚（27日）快活谷第七場三班1650米隻「開心遊戲」一向係沈拿同鄉兼老友李寶利嘅座騎，但李寶利呢場揀騎新勝馬「紅運發財」，練馬師羅富全就搵嚟沈拿幫手策「開心遊戲」，驟似「執二攤」，但沈拿對記者第一個反應就答：「可能係李寶利自己揀錯呢！」

「開心遊戲」上季中贏田草1200米後就冇乜突破，轉到羅富全後，上場谷草1650米跑獲季軍，羅富全解釋6歲嘅「開心遊戲」性能漸轉均速，谷草短直路嘅一哩賽會最合發揮，而且又咁好彩同上場一樣抽到有利嘅2檔，跑法更有彈性，隨時為沈拿帶來今季首場谷草頭馬。