44歲嘅利嘉兒（Lily)同製衣富商老公Bong，經過8年努力，今年終於懷上第一胎，囡囡今個月即將出世。

陀住9個月巨肚嘅利嘉兒，早前去咗影一輯藝術風型格大肚寫真，佢話：「之前一直想影戶外，但前排好熱又落雨，最終喺影樓影，想有型啲，暗黑、神秘啲。」見佢著住貼身背心、比堅尼露出圓渾孕肚性感上陣，仲同老公同埋兩隻愛犬一齊影相，喺影樓影咗足足3、4個鐘。

利嘉兒話：「從來冇諗過要影性感相，怕肉籐籐。係有一日，自己坐響度，睇到個肚係咁郁，跳得好勁，BB好生猛，覺得有個生命喺肚入面真係好珍貴嘅體驗，所以想紀錄低佢。影個時都好尷尬，雖然兩公婆，但我大肚又升咗兩Cup，老公企喺度影時，有啲角度影出嚟好似佢望住我個胸咁，好搞笑。」另外，兩只愛犬都一齊影，一黑一白最考打燈，利嘉兒話：「佢地年紀大，冇四圍跳，都好順利，佢地係我哋屋企一份子，好似兩個仔咁，之前都有同佢哋做心理輔導。我好希望多啲人知道狗狗係唔會影響BB，仲可以陪伴BB成長。」

預產期10月初嘅利嘉兒同老公商量後，決定喺中秋節前剖腹:「我地信教，冇擇日，只係㨂鐘意嘅日子，老公迫BB同佢同一個星座，所以會提早少少，係處女座。」利嘉兒體重升咗近30磅，更開始出現雙腳水腫、手指麻痺等情況，佢笑言要多謝身邊朋友比佢更緊張，已經幫手買咗好多嬰兒用品，反而自己連走佬袋都未執：「下星期開始真係要閉關，唔好行咁多，免得BB提早出世。」

精選娛聞，喺晒《娛果》
http://fb.com/appledailyent