今日（18日）第八場打吡大賽，告東尼三雄「時時精綵」、「中華盛世」同「幸福分享」都抽外檔，主要對手苗禮德之「星洲司令」就3檔，加上此駒喺香港經典盃輕鬆贏馬，勢受熱捧。

不過「時時精綵」騎師潘頓就點出咗「星洲司令」之「疑點」，佢嘅論點成唔成立，完全視乎閣下觀點與角度。

潘頓從未騎過「星洲司令」，但佢話經常留意此駒嘅操練，最令佢感到特別就係「星洲司令」今場賽前冇任何試閘，反觀同場多匹爭標份子，都有試閘練氣。

「星洲司令」喺經典一哩賽同香港經典盃賽前，都有去試閘，今次就乜閘都冇，只係曾落草地拍跳，「星洲司令」無論喺南非同香港都未試過跑2000米，雖然上場贏1800米，但2000米更講求氣量，而且要轉兩個彎，跑法同1800米完全唔同。

究竟點解「星洲司令」今場賽前冇試閘，始終無法得到答案，潘頓觀察細微，就連各匹對手嘅晨操紀錄都唔放過，反映出佢專業嘅一面。潘頓隻「時時精綵」係全場少數贏過田草2000米嘅賽駒，究竟「時時精綵」同「星洲司令」邊隻先過終點，真係要鬥過先知。