呢輪政府公布新一季嘅失業率高達百分之八點六,大使喺電視同報紙度睇見好多機構舉辦嘅大型招聘會都人頭湧湧,打工仔淨係想攞份申請表都要等個幾小時,當中有唔少係失業咗幾個月或者幾年嘅雙失青少年、應屆畢業生。佢哋接受訪問嘅時候都講明唔計較收入幾多,淨係希望學吓嘢,攞多啲工作經驗。
𠵱家經濟咁差,要搵一份工真係唔容易,大使呢排都收到唔少失業家庭嘅求助,佢哋屋企除咗父或母被裁員失業之外,仔女好多都係啱啱畢業出身或者雙失青少年,所以一家幾口除咗唔夠錢交租之外,更加冇錢開飯,生活陷入困境。為咗解燃眉之急,大使都即刻為佢哋向蘋果基金申請緊急經濟援助。
望僱主多提供機會
其實,蘋果基金向來都重視呢班未來的社會棟樑,以往基金曾撥款四萬幾蚊,資助社會福利機構舉辦唔同類型嘅雙失青年職前培訓計劃,為佢哋提供職前培訓同埋實習機會,將來可以自力更生。
大使希望善長仁翁除咗透過捐款幫助呢啲失業家庭度過經濟難關之外,亦盼望僱主畀多啲機會呢班失業嘅青年,等佢哋唔使咁彷徨,可以有份工發揮所長,重拾自信心。
暖流熱線
電話:29908688
傳真:23702192
電郵:[email protected]
網址: http://www.charity.atnext.com