呢晚單睇上半場無疑係人馬開齋之夜，事關頭三場「利李之星」、「善喜」及「金珀龍華」都係在港首次贏馬，令到頭兩口孖寶，由三匹賽前未勝馬包辦。去到第四場三T頭關，輪到騎師開齋，澳洲好手布文接手容廐「多多心得」，直路後上一攻而破，個人歷史性在港建功，幫埋容天鵬連續第二日贏馬，而向來鍾意打扮嘅容天鵬太太，呢晚大晒超短裙show靚腿拉頭馬，冇枉費一番心機。
馬迷心水清都會記得「多多心得」正正就係容天鵬從練開齋馬，此駒季初轉倉初出，由馬偉昌爆大冷贏谷草1800米，事隔半年後再贏都係呢個路程，只係配搭唔同咗啫！其實布文今晚原本冇運，皆因頭場「利李之星」由佢騎開，卻換薛寶力即勝，好彩有容天鵬雪中送炭，彈隻「多多心得」畀佢跑，令佢可以走出之前兩個賽日三度做二奶嘅陰影，客串到第六日終於打破齋缽。