蔡約翰剛周三（14日）出馬六匹，賽前看較上風只有「紅運爵士」，但仍交到2W2P，如非「勁豐裕」及「勁皇子」走位執輸到無倫，隨時大四喜！

提到騎「勁皇子」的田泰安，出閘慢半拍已算，以谷草B欄放頭馬群多會掟彎後向外移出，「勁皇子」根本不用刻意飛出外叠，仍可沿內叠攝位望空，在蝕上加蝕後影相第四，真苦了將該駒賭到着格的大戶！

話口未完，第五場田兄騎「盡開顏」又在無必要下掟個大彎，拉士騎到身都側埋應贏變輸，再加上次日馬（11日）又有飛到出公眾席才跑到無P的「白鷺飛翔」，怎不教捧場客無名火起！

話雖如此，田泰安今季在騎師榜僅次於雷神及潘頓排第三，點解練馬師又咁鍾意呢位論盡王？經驗由失敗累積，看來日後再要賭田泰安，要先預計該駒有本事讓兩個馬位。

羅理雅今季頭馬還少田泰安一場，但他是除莫、潘兩強外，唯一勝出率達雙位數的全季騎師，兼且這位澳將發揮一些難攪馬頗有辦法，剛周三將重口難留的「文藝學家」騎得貼胋服服打疊贏便屬其一。

今次（18日）尾場「綫路勇駒」季內雖未勝，但不只一次在賽事形勢輸蝕下輸近，難贏馬今次用到羅理雅，有心對症下藥，論馬上季尾曾於二班千四締佳速奪亞，且看能否憑羅理雅功架拚出頭來。

另外，第二場「嬴風雲」上仗配羅理雅跑千四全程外遊只輸個多馬位跑第四，乃騎者老貓燒鬚之作，難得今次保得住帥印，應不會重複犯錯，有力補中。