啱啱收到網上行寬頻賬單,發現多咗一項收費,係「NetmailPlus18」,要成18蚊。我根本唔知呢項係乜嘢服務,亦從來無申請過,咁樣即係老屈啫。即刻打電話去熱線,服務員話呢個服務,原來喺我申請寬頻時免費送嘅,電郵箱加大至1G,但18個月合約期滿後就要收費,仲話「應該」有電郵通知我喎。
冇可能喎,我日日都check電郵,如果唔係今次就唔會睇到賬單,發現問題啦。我要求停止服務,服務員話可以,但由於服務開始咗半個月,我都要交番一半費用。我梗係睬佢都儍,喺我堅持下,佢終於話豁免呢筆費用。
網上行發言人回應,一般免費試用嘅服務都有限期,而合約都會列明,屆滿後若客戶唔提出終止,就會當作繼續享用服務,並自動徵收費用,而此舉是為省卻客戶申請延續服務嘅手續。所以話呢,便宜莫貪,以後人哋送咩試用服務,都唔好隨便要,隨時俾人乘機收錢呀。
逢周一至周四刊出