由金允錫及朱智勛主演嘅新片《暗數殺人》，將於下月喺韓國上映。《暗數殺人》係根據2007年發生於釜山嘅真實案件改編，講述服刑中嘅殺人犯，主動供述另外七件警方冇查到嘅殺人案而引起嘅故事。不過有受害人家屬，近日就決定向法院申請禁令，禁止《暗數殺人》上映。

《暗數殺人》片方之前曾表示，影片只係參考案件，劇情完全屬於原創，不過受害者家屬睇到影片後，發現影片中犯人嘅作案手法、屍體藏匿地點，都跟真實案件一模一樣，為佢哋帶來巨大衝擊。受害者家屬嘅代表律師表示，《暗數殺人》片方再一次傷害受害者家屬，因此受害者家屬一致決定向法院申請禁令，禁止《暗數殺人》上映。

《暗數殺人》片方今日表示，為未能跟受害者家屬充分溝通、令佢哋再次受傷而道歉，片方指：「已經盡可能刪除暗示特定人物嘅內容，宣傳方也將盡一切努力，於宣傳過程中唔令受害者家屬再次受到傷害。」

更多韓流，喺晒《娛果》
http://fb.com/appledailyent