Accumulator（累積認購期權合約）一度叱咤股壇，傷咗唔少散戶，但散戶係善忘嘅，「Ikillyoulater」嘅傷痛好快唔記得。一向幫散戶抱不平嘅保障投資者協會會長呂志華話，舊年9月至10月係投資者買Accumulator高峯期，大市跌後，如今平倉斬纜嘅已經冇咗一大截，估計仲「生還」嘅Accumulator金額得番1500億銀，較最高峯時跌咗三分二。
Accumulator跌破行使價要雙倍接貨嘅買賣機制，依然唔能夠輕易放過，呂志華最近就推出專書《阿Q咪理他》，表明要「揭開世上最邪惡的投資工具」，字眼同美國「反恐」睇齊。呂志華話，協會至少成功令私人銀行推出Decumulator畀苦主對冲，減低損失。即係咁，華華唔係專業投資者，Decumulator係咪可以做對冲？真係一個大問號！