火箭班主亞歷山大（Leslie Alexander）賣盤，早前已經傳出名宿莫湯保（Dikembe Mutombo）有意接手外，近日更傳出另一名宿奧拉奧雲（Hakeem Olajuwon）同樂壇天后Beyonce都有意加入戰團，成新任火箭班主。

據《福布斯》估計，火箭簽入基斯保羅（Chris Paul）、同夏登（James Harden）合組夢幻後場後，市值升到大約16.5億美元（約129億港元）；但《福布斯》就指Beyonce身家大約得3.5億美元（約27.4億港元），冇可能獨力買起家鄉球隊火箭，好大機會要搵人合組財團收購。

不過，Beyonce嘅老公Jay-Z雖然身家約值8.1億美元（約63.3億港元），但佢就唔會幫到老婆喇，因為早前佢創辦經理人公司Roc Nation Sports時，都要賣出手頭上嘅網隊股份。