【新增圖片及內容】
神劇《太陽的後裔》男女主角宋仲基、宋慧喬，早前認戀兼宣佈於下月31號結婚，而兩人噚日更被粉絲獲捕合體喺韓國出發去美國洛杉磯，係兩人宣佈婚訊後首次被影到孖住現身。網民今日公開雙宋飛抵美國時嘅照片，指喬妹真人好靚，望落好年輕同嬌小。

有網民又指見到喬妹右手無名指戴上戒指，猜測係宋仲基送嘅訂婚戒指，不過就有粉絲表示喬妹一向都有戴戒指嘅習慣，而且婚戒應該係戴左手，認為照片中嘅未必係婚戒。

另外，有網民表示，雙宋友人更新Instagram Story指眾人身處三藩市，之後又傳雙宋係轉機飛去紐約，不過消息未經證實。而雙宋方面今日發聲明表示，宋仲基及喬妹出國係屬於私人行程，所以唔會多作回應。

另外，一向愛國嘅喬妹持續多年支援誠信女子大學嘅徐京德教授製作小冊子，喺海外宣揚韓國歷史，兩人關係密切。早前有傳與喬妹相識多年嘅徐京德教授將任雙宋婚禮嘅證婚人，不過教授近日現身KBS節目《早晨》時否認消息，表示係誤報，令外界更加關注雙宋嘅婚禮。