鄉郊代表選舉明年一月進行，有傳新界西立法會議員朱凱廸有意喺所住嘅元朗八鄉元崗新村參選，可能阿廸殺傷力太大，令佢被鄉事派針對，4名村民以「無見過呢位朱先生」為由反對阿廸登記為鄉村選民。阿廸早前已經出席反對個案聆訊，力證自己已經住喺元崗新村6年，因為早出晚歸先令居民誤會，聆訊暫未有結論。

據知當日聆訊，4名反對居民中，馮啟念、楊敬文同莫鈞濠都有出席，身為元崗新村居民代表嘅楊金粦則未有現身，自稱「日日都喺屋企」嘅馮啟念話自己2015年初入住元崗新村，「踩咗咁多次單車，都無見過呢位朱先生」，莫鈞濠就話見過朱嘅妻女，但認為朱唔係經常喺元崗村居住。阿廸就出示由太太簽署嘅租約同結婚證書，證明自己住喺元崗新村，朱太都有作供，佢話老公太勤力嘞，經常早出晚歸，所以「見得佢少」，又話老公多年來因公忘私，所以自己先係一家之主，簽租約同交水電費都係佢負責囉。由於阿廸需要補交租約，預計本周稍後嘅聆訊先有結論。

八方問過阿廸，佢估計有人認為佢有機會出戰鄉郊代表選舉，故此動員村民反對佢成為鄉郊選民，旨在令佢失去出選機會。