近年曾志偉傳同無綫(TVB)高層余詠珊不和，令到志偉減少亮相TVB，而今年7月志偉更加倒戈，為無綫競爭對手ViuTV世界盃節目擔任嘉賓，甚至飛埋去俄羅斯幫ViuTV講波，明剃TVB眼眉。雖然志偉當時表示TVB唔會咁小器，又透過傳媒講自己有興趣做港姐司儀，但最終傳無綫封殺志偉，所以港姐司儀冇預志偉。

不過，志偉同無綫原來已經破冰，聽晚一年一度大型籌款節目《歡樂滿東華》，志偉將會擔任司儀。《蘋果》記者今日向東華主席王賢誌了解，佢話:「係呀，TVB都出緊promo，佢聽晚會係10大司儀之一，聽晚有叻哥(陳百祥)、Liza姐(汪明荃)，因為之前佢要度期，所以好後先至ok，變咗11月press conference我都唔知佢得。」

之前志偉幫ViuTV講波，搞到無綫封殺志偉，港姐都唔搵志偉做司儀，今次志偉做《東華》司儀，係咪代表志偉同TVB破冰？

王賢誌話:「咁我又唔知算唔算佢哋之間破冰呀，其實我好早同志偉講要幫手，皆因我喺演藝人協會做理事做咗4年，成日同志偉開會，我同佢講我做主席時你一定要支持《歡樂滿東華》。到今年我上任之後，其實都冇見佢喺TVB出現過，我諗今年個timing會唔會唔係好適合呢，所以變咗我冇push呢件事囉，到上一、兩個月我再埋手傾個內容，因為今年所有人選、表演嘉賓其實我都有份一齊去搵，我再提起呢樣嘢，跟住再同TVB傾，一齊再誠意邀請志偉，佢都要再度期，所以最後先知。我有直接打畀佢約出嚟傾，其實唔單只佢，好多人都係我親自邀請㗎。」

精選娛聞，喺晒《娛果》
http://fb.com/appledailyent