本周最過癮嘅quotablequote就係寶蓮寺監院釋智慧法師講嘅：「政府當我齋talk。」我哋講呢句，當然已包含咗不滿情緒，由佛教法師講就妙不可醬油，皆因寶蓮寺係食齋地方，和尚日日食齋，佢哋食完齋就talk，係名副其實嘅齋talk，一啲政府高官唔聽釋智慧支笛，表錯情，就真係要震盪腦袋，釋放一啲智慧出嚟至得。陳日君主教講嘢，好唔啱聽，就可以當佢齋talk啫，釋智慧法師噃，政治立場與董特首保持一致，經常挺董，斥責法輪功係邪教，佢講說話，地鐵與高官豈可唔聽，你哋咪搞到董特首與寶蓮寺面左左啦。

左丁山唔係教徒，只信瞓覺，但支持寶蓮寺封山抗議政府，地鐵破壞佛門清靜地。廖秀冬係環保信徒，佢都應該支持釋智慧。昂平吊車旅遊計劃，不脫大笪地、食檔、攤販嘅旅遊模式，雜亂兼庸俗，將來喧嘩不堪，完全與寶蓮寺附近嘅山嶺自然環境不符。搞旅遊，要追上時代，配合文化發展，唔好一味迷信柴娃娃嗰啲舊橋。計我話，寶蓮寺附近唔應該興建旅舍食肆，只應興建一個佛教文化博物館，展出佛教歷史、文物、佛像、佛經以及饒宗頤教授手筆嘅《般若心經》等，遊客、香港市民靜心遊覽，領悟佛教道理，感染佛教文化，與寶蓮寺互相呼應。左丁山認為呢個係「幾贏」（唔止雙贏）方案，唔好當我齋talk呀！