【賢仔Call馬】要橙唔要草 家俊葫蘆裏賣咩藥?(廖浩賢)
梁家俊廖浩賢好甜橙蟲草之星賢仔call馬
剛完成9月份賽事,蔡約翰終於逃離榜末位置,前晚(26日)一口氣連贏兩場,威風八面,剩下鄭俊偉及蘇保羅仍然零頭馬。
下周一(10月1日)國慶賽馬日,鄭、蘇兩廐各出三駒,鄭廐「金碧科」及蘇廐「一定賺」季內首戰均入位。
當中,「金碧科」這席第三跑贏再出建功的「喜得福」,水準有保證,乃鄭俊偉新季開齋希望。
跑過六次賽事,剩餘鄭俊偉及蘇保羅未開齋,蘇保羅一如以往嘆慢板,下周一田戰只出馬三匹,連同先前跑六期馬,加埋出馬不夠十匹,其態度依然皇帝女唔憂嫁。
鄭俊偉方面,今期同樣出馬三匹,但總括今季積極程度進取得多,出馬21匹,五次跑入位置。
較之丁冠豪當然無得比,但相對文家良出馬23匹,只兩駒入圍,最大分別就係文廐有馬贏,鄭廐最叻拼入位置,總欠臨門一腳。
老實講句,鄭廐今季情況嚴峻,所指的是兵力不足,新馬未得,舊馬傷弱殘樣樣齊,相信今季條路更為難行,要開齋除加把勁之外,還要靠年輕力壯的戰馬。
今戰列陣第四場四班1400米的「金碧科」,算係目前鄭廐最具潛力向上爬升馬匹,由上季開始一直有留意其表現,五戰全部跑五或六名,一而再後追接近,上季更曾找來雷神操刀,可惜塞車未盡施為。
今季踏入四歲,開鑼日(2日)立即有進步演出,雖然輸給「贏馬神器」跑第三,其實隔籬左右馬全屬實力指標,跑第二名「美麗日子」再出放得太急僅輸第二,第四名「喜得福」再出力拒「同歡樂」贏馬。
計上述兩駒表現,就知開鑼戰屬極高水準賽績,鄭廐可拼籌碼無多,看來要開齋非靠「金碧科」不可!
另外想講第三場四班1200米是一個亂局,實力馬「老實人」、「蟲草之星」、「七十七十」等都是今季初出,賽前試閘有好走勢,但始終未熱身。
最奇怪的是「蟲草之星」,早在「山竹」襲港取消賽事當日(16日)已經報名上陣,當日報名騎師是梁家俊,今次卻用李寶利,究竟葫蘆裏賣甚麼藥?
梁家俊今場騎「好甜橙」,是否高得過「蟲草之星」,橫睇直睇都唔似,還是梁家俊一早應承要騎「好甜橙」,為免順得哥情失嫂意呢?