大陸搜尋網近日出現「崔永元」、「馮小剛」、「范冰冰」等名字！馮小剛近日捲入黑材料事件，不過佢堅持拍續拍《手機2》。

崔永元連日爆料，矛頭直指《手機》系列導演馮小剛。在風浪尖頭上，身在南京嘅馮小剛，繼續拍攝搞出今次事件嘅電影——《手機2》，並於微訊朋友圈出圖，圖力證工作未受影響。據知《手機2》已拍咗三分二，停拍機會不大。

崔永元今日稱稍後將有驚人爆料，足已令涉案人士坐牢，不過佢未有透露內容。據知，《手機2》將於明年農曆新年上映，崔稱，屆時電影做宣傳會，會再放材料。

事緣就係因為馮小剛開拍電影《手機2》，據知當年拍第一套時，馮小剛邀前央視著名主持人崔永元到屋企作客，問及一啲有關做主持嘅細節，為電影做準備，當時馮導老婆徐帆更親自包餃子，席間崔永元仲俾咗一啲拍電影情節嘅想法，結果馮小剛將崔永元嘅事蹟用喺戲情中，仲編排《手機》男角色搞婚外情，將原本工作崗位讓俾第三者嘅情節。

崔永元因為《手機》受網民侮辱，受到輿論壓力，同時傷害到佢嘅家人，事後劇組向崔永元道歉，而馮小剛只解釋係同崔永元「開個玩笑」，點知對方「不上路」仲覺得好遺憾，事件不了了之，直至馮小剛開拍續集，崔永元曾問劇組編劇劉震雲，劉震雲當時指新作叫《朋友圈》，點知過幾日，崔永元先知原來戲名係叫《手機2》，崔永元本身患抑鬱症，對事件大受打擊，最終炮轟《手機2》導演馮小剛、《手機2》編劇劉震雲，同時爆有中港藝人簽「陰陽合同」，爆出「逃稅風波」，揭露中國瞞稅同走資問題，引發軒然大波，中央反腐敗協調小組國際追逃追贓工作辦公室，昨日公佈50名涉嫌職務犯罪和經濟犯罪的外逃人士的線索，當中包括快鹿集團前董事長施建祥，即《葉問3》的金主。