「2018亞洲小姐競選——大中華賽區」記者會，今日喺大埔亞視錄影廠舉行。過去三年亞視在香港停辦亞姐選舉，適逢今屆亞姐30周年，再度在港隆重舉行。

過去兩屆亞姐，即2016年及2017年，都在大陸舉辦，該兩屆冠軍李思琪及何丹妮今日在活動上與亞視簽訂演藝合約，98年港姐冠軍向海嵐及2011年亞姐冠軍馮雪冰皆到場支持及分享。

何麗全成為本屆亞視首席「內容官」（CCO），佢話今年亞姐正值30周年，兼且今年使用OTT播放，所以重新舉行亞姐選舉，已有廿多個賽區開始接受報名 ，十一月會舉行決賽，包括大中華區、香港及海外佳麗一起決賽，預計決賽會喺外地舉行，並非大陸。

對於亞視有何來資金搞亞姐，何麗全話：「今次有幾個贊助商，所以製作費一定唔少，七月就會開始招募參選佳麗，今次亞姐嘅參賽條件，最少要18歲、係香港居民、年齡亦有上限，但係遲啲會一次過公佈。」何麗全話今次會好揼本，俾佳麗參賽前喺海外受訓：「會請星級導師，教佢哋跳舞、化妝等等。」