入伙三年的筲箕灣愛東邨，爆竊案頻仍，居民指與鐵閘設計有關，但投訴後房屋署拒作改善，除非住戶自費更換鐵閘鎖或獲房屋署批准之鐵閘款式，居民不滿房屋署沒誠意改善屋邨治安。

自愛東邨落成便遷入的梁小姐稱，入伙時已發現單位鐵閘均為附有「中板」拉閘，即鐵閘中間密封，但鐵閘頂部及底部均有約八吋高、四吋闊通風口。

伸手入閘容易開鎖
她說，那些通風口相當寬闊，很容易伸手入內扭掣，開啟鐵閘鎖後入屋。「近期爆竊案增多，好多居民都覺得係同鐵閘設計有關，只要隻手較瘦、或者由通風口伸啲鈎入去，就好易開到鐵閘鎖。」
梁小姐說，她其後在鐵閘底部通風口加上鐵片封閉，免被人有機可乘。
另一居民陳先生，亦指鐵閘設計存漏洞。「鐵閘下面通風口真係好有問題，我平時冇帶鎖匙，都係就咁伸手入去開閘，所以封咗下面通風口就會穩陣啲。」
除鐵閘底部通風口過於寬闊外，居民亦指鐵閘與牆壁間空隙闊過半吋。記者亦能將手指伸進內，「雖然啲手指伸唔到入去個鎖度，但都可以伸到啲鐵線入去」。