由男星池城同女星黃靜茵主演嘅新劇《KillMeHealMe》將會喺後日正式首播，今日兩位男、女主角同其他演出演員，就現身首爾上岩洞舉行嘅新劇製作發佈會，仲齊齊整出心心手勢冧大家，為新劇造勢。

今次係池城同黃靜茵繼上年嘅KBS劇集《秘密》之後第二次合作，所以佢哋喺發佈會都話今次合作感覺好好，大家都唔使再花時間warmup就已經好合拍，池城仲話：「上次拍完《秘密》之後，我哋曾經講過下次要再一齊合作浪漫劇，今次真係實現咗。」

而提到池城為咗拍新劇冇時間陪剛剛踏入懷孕期嘅老婆李寶英時，池城就搞笑咁話：「雖然我冇時間陪佢，但我係為咗賺錢，佢應該會原諒我嘅。」之後佢又大讚老婆話：「老婆做得好好，我因為要凌晨出去，凌晨返去嘅關係，老婆都因為我連瞓覺時間都改變埋，仲會支持我同埋照顧我嘅飲食，真係太得人鍾意。」

池城對老婆有讚冇彈時，黃靜茵一提起男朋友金勇俊就只有埋怨，黃靜茵：「鬧咗交，冇聯絡喇。我因為拍攝好忙，仲患上感冒，本來想食餐好嘅，就叫佢去book枱，點知佢book唔到，睇嚟都到咗分手嘅時候。」引嚟笑聲。