韓流天王Rain噚晚喺香港亞博館舉行《THESQUALL王者歸來Rain亞洲巡迴演唱會》香港站,吸引大批歌迷到場支持,當中包括藝人羅霖,歐陽妙芝,琦琦母女,黃聖依等人。
Rain為冧港迷出盡冧功,包括濕身、爆衫騷肌肉、自摸PatPat、單眼晒萌樣等,落力演出超過兩小時。
Rain主要係用英文及韓文同粉絲交流,而佢最識講嘅廣東話就係「多謝」。Rain話:「大家好,係咪好耐冇見呢?好掛住大家。香港對我嚟講係個好重要嘅地方。香港嘅女仔好靚女,另外今晚都有好多男仔,多謝大家。」
Rain又話佢由20幾歲唱到踏入3字頭,好感謝大家一直以嚟嘅支持,又透露:「2016年我會送好多禮物畀粉絲。我依家喺韓國拍緊劇,希望快啲俾大家睇到。另外我今年推出嘅專輯,會有英文及中文版。」之後更用中文演唱內地劇《克拉戀人》嘅主題曲。
而鬼馬嘅Rain於騷上教大家尖叫,又搞gag要大家笑多啲。臨近尾聲時,佢拎出手機玩VAPP直播,不過繙譯講錯係「VAA」,Rain忍唔住於台上笑出聲,結束直播活動前,Rain話:「我會去食雞蛋仔㗎啦。」唔通佢又要突襲旺角?
噚晚Rain勁益港迷,兩度除衫,而高潮位就係赤裸上身,大騷佢啲肌肉,加上濕身效果,令全場粉絲陷入瘋狂,尖叫聲不斷。