特區繼續暗流洶湧。所謂嘅人大常委曾憲梓，突然一反常態，擺出一副慈祥面孔，好聲好氣安慰港人，話釋法毋須擔心，中央人民政府一定會盡量滿足香港人嘅願望咁講。
曾憲梓侮辱港人，一向當做家常便飯，其謾罵嘅用語，亦最為惡毒，重試過膽粗粗，用錯字眼，膽大包天，將胡溫形容為死老鼠㖭。今次突然轉性，估計同換腎嘅生理後遺症冇乜關係，而係收到上層指示，叫佢出嚟降吓溫。
釋法惡例陸續有來
就算中央人民政府之中，有人出於一番好意，一啖沙糖一啖屎，但親中愛國有個曾憲梓，即使係沙糖，都俾香港人當做係砒霜。中央人民政府既然決定咗釋法，一件係穢，兩件又係穢，由居港權問題開始，釋完又釋，將來乜都有得重新解釋。例如：香港保持資本主義現狀，五十年不變，五十年原來係由一九八五年簽署聯合聲明嗰日開始計，咁即是話最遲到咗二○三六年，香港就可以轉行共產福利制。
又例如老鄧話過：舞照跳、馬照跑、股照炒。「舞照跳」嘅跳舞範圍，亦可以由人大常委再次解釋為跳健康舞、中國古典舞、拉丁舞，並冇話到准跳的士高及舞廳嗰隻貼耳咀頸情慾滾熱舞。只係話准齋跳舞，冇話到跳完舞重准去酒店有下文。唔怪得警方最近旺角淫業大掃蕩，原來係特區政府主動配合人大釋法。
至於「馬照跑」，亦可以「釋」為只准齋跑馬，亦即國家只准繼續經營上水古洞村騎術學校，准跑馬，未必係准賭馬。而「股照炒」，只係話准炒國家紅籌股，冇話准炒滙豐太古等英殖民餘孽股；淨係准炒股，冇話准炒孖展同外幣。所以一開釋法惡例，日後陸續有來，教育工作者及道德團體，不妨多多向人大常委請願，要求對「舞照跳」三個字進行釋法，保障吓持雙程證來港我國北姑嘅婦女尊嚴。