《蘋果》今日收到消息,女團Super Girls(SG)其中一名成員亦有在現場,一度遭警方截查。翻查資料,SG五名成員中以36歲的蔡明思(Jessica)在年齡上最接近被捕人士,其經理人代為否認:「唔係Jessica,係Aka(趙慧珊)去深水埗一間廟還神,遇到呢件事,有查身份證,但查完走得,冇被捕。」對於捲入黑社會入會儀式,Aka亦大方回應:「噚日同一個女性朋友去關帝廟還神,臨走時就好多警察入咗嚟,封鎖咗個廟,我哋協助調查。一開頭係有啲緊張,因為我哋唔係見慣大場面,都係巡例查身份證,同巡例問咗啲個人資料,同問我哋係咪識得廟裏面嘅人,咁之後我哋澄清咗唔認識,咁就放咗我哋走。」