今年29歲嘅無綫新聞主播駱文捷(April)，今年4月同任職警務人員、姓鄧嘅總督察拉埋天窗，噚日佢宣布離開TVB，轉新工，展開人生新一頁。

April今日接受《蘋果》電話訪問，透露8月初會轉職做市場推廣及公關，仲計劃生小朋友。佢話﹕「我最初係做娛樂新聞台，後來入News，都有啲唔捨得嘅，哈哈。(係咪工作時間太長？)我諗做新聞，邊度都差唔多，主要係我結咗婚，想搵份穩定啲工作，方便照顧屋企，生BB都有諗過，係計劃中，但未有。」

駱文捷喺09年城大畢業後，任職有線娛樂新聞台主持，2011年入職亞視新聞擔任記者及主播，翌年轉投ROADSHOW，2013年去無綫新聞成為無綫新聞台及無綫互動新聞台主播，間中兼任《中華掠影》節目主持。2015年開始主持新聞提要及天氣報告，之後仲擔任埋星期日《香港早晨》主播。問到多年來最難忘係乜？佢話﹕「好多新聞都好難忘，例如啟晴邨槍擊案，又或者最近金鐘有狂徒放氣油彈，重大新聞做直播好考你反應，氣氛好刺激，要夠專業，嗰啲情況幾難忘。」

不過，在網民心目中，駱文捷報道「哥凸啦X拉」先係最經典。

April都笑住承認﹕「係，係呀！」介唔介意俾人笑？佢話﹕「第一次都會覺唔開心，其實我讀過呢個新聞好多次，嗰朝係不停讀呢個新聞，但咁啱嗰下『Kick』住咗。(仲驚？)係啦，但又唔可以草草了事，一定要更正番自己。我都知網民好開心，當回憶啦。」

大台靚女主播走下又一個，April話唔擔心青黃不接，仲叫大家細心啲發掘，佢話﹕「o依家好多新主播，好多新面孔，令人耳目一新，留喺度嘅同事都要繼續努力，每個人唔同階段都會有唔同發展啦。」