李嘉欣今日罕有現身書展，支持陳善之新書「善緣滿佈-回首前塵四十載」。

對於陳善之，李嘉欣就話：「佢(陳善之)做咗我超過20年嘅經理人，欣賞佢好率真，好多時都企喺我立場諗，幫我分析，其實我都有任性嘅時候，但係大家都好坦率，同埋佢都好體恤我，幫我計劃好多嘢。」

雖然二人合作超過20年，但嘉欣話大家有時都會為雞毛蒜皮嘅事而嘈交。嘉欣講：「有時鬧起上嚟，嗰一刻真係嬲o架，不過我都知自己有幼稚嘅時候，唉！我又唔好意思話佢都幼稚啦，不過大家好快冇事！唔會嬲好耐，因為我自己個心唔可以有個結呀，所以都係3、4日就會傾番偈，有時自己都有唔成熟嘅，最緊要大家係對事唔對人就得啦！」