日本今日公眾假期，長壽節目《Music Station》炮製馬拉松式特備節目，由中午12點播到今晚，請嚟唔同年代歌手、組合輪流獻唱，仲安排唔同單位唱出J-pop界幾十年來金曲，似足大台節目《流行經典50年》。不過日本網民對於節目大唱名曲就各有意見，有人認為《Music Station》已變成老歌節目。

節目由中午開始播放，AKB48家族、Morning娘，乃木坂46、SEKAI NO OWARI、大黑摩季、西野加奈等單位輪流獻唱，而觀月亞里莎就現場演釋作品《TOO SHY SHY BOY!》。呢首92年推出嘅作品《TOO SHY SHY BOY!》，觀月喺上年為出道25年專輯作重新演繹，今日佢上節目演繹時，節目仲重溫佢當年片段，現年40歲嘅觀月，兩年前已經嫁有米社長青山光司做闊太，當年嘅少男偶像已經變成大媽，佢獻唱時仲露雙下巴。

而節目下午今晚將繼續有Perfume、Hey!Say!JUMP、嵐、福山雅治、TOKIO、B'z、星野源同YOSHIKI等陣容表演。