立法會原本今晚搞FunDay，等議員同記者可以玩翻晩，不過今日籌委會主席梁君彥宣佈押後到下星期先搞。本身係FunDay籌委會成員、會計界議員梁繼昌同八方講，原來係噚晩半夜有人提出，因淘大工廈大火仲燒緊，唔係好適宜呢個時候搞FunDay，經商討後決定押後。

梁繼昌同八方講，噚晩十點幾佢發現有人傳來訊息，話因為淘大工廈大火仲燒緊，如果今晩如期搞FunDay唔係幾好，所以提出幾個方案，包括只係食飯唔玩遊戲，但都有人覺得係呢個時間，一齊食飯再影相都唔係咁好，最後記者代表就決定同秘書處講，不如將FunDay押後舉行，佢同泛民代表聽到亦好同意，並即時通知籌委會主席梁君彥，不過梁君彥晚上11點幾時似乎已瞓咗覺，結果今早先回覆，最終同意延期舉行。

梁繼昌又話，自己為準備FunDay搞到頭都暈埋，因為佢本來要不斷唱歌，又要準備特備節目，更要做大會遊戲主持，真係好多嘢搞，仲煩過開會，家要押後，佢最擔心係FunDay訂晒食物，唔知點處理，好彩打電話去餐廳時，餐廳話仲未煮，所以能夠取消，可以將訂餐順延畀7月5日FunDay用。