裝電話送電器遲遲未送貨
蘋果日報 2004/08/02 00:00
香港寬頻早前推出「裝電話送電器」優惠，凡簽約兩至三年者，均可獲贈自選電器。本報近日接獲多名讀者投訴，有指簽約後兩個多月仍未獲贈已選電器，有不滿所選禮品沒有貨，致遲遲未收禮品。消委會指客戶登記服務後，超出兩個月仍未獲取贈品，並不合理。
「線又冇冷氣機又冇」
「錢照扣，電話線又冇，連我揀嘅贈品冷氣機都冇！」陳小姐想起由5月中簽約至今，仍未獲贈冷氣機便一肚子氣。她怨道，電話費已付，但仍未獲安排轉線，贈品冷氣機更無蹤影。「約就簽咗，錢又照交，銀行嘅資料又一早畀晒，但遲遲未批，𠵱家我線又冇，冷氣機又冇！」
「新居入伙冇電視睇」
「我啱啱新居入伙，咪諗住唔使特登買電視機，但等咗兩個月都冇，搞到我咁耐都冇電視睇！」於5月底新居入伙的甄先生不滿地表示，入伙至今已兩個月，亦已繳付電話費，但每次致電香港寬頻追問何時送上電視機，職員總未能確實回答。「搞到我𠵱家唔知買唔買電視機，唔上唔落，都唔知點算好！」
「MP3冇貨硬銷冷氣機」
「簽約時我明明揀咗要MP3機，佢哋點可以一句話冇貨，就夾硬要我改要冷氣機㗎！」於6月簽約使用香港寬頻家居電話的鍾小姐表示，簽約時揀選了MP3機，但日前卻收到職員來電，指MP3機沒有貨，着她改要冷氣機，不停硬銷。她雖即時拒絕並作出投訴，但遲遲未獲回覆，她遂轉向《蘋果》投訴。
香港寬頻回覆稱，根據禮品換領細則，該公司會於客戶成功安裝及辦妥信用卡免息分期付款後的兩個月內作出安排，但銀行於上月中始接納陳小姐的申請，故禮品換領信將會隨後發予她。且因辦理攜帶其原本的電話號碼過台手續時，始發現其身份證號碼有誤，故需有待繼續跟進。
記者查看陳小姐的月結單，發現香港寬頻確已在其帳戶過數，但香港寬頻未有就此回應。
此外，該公司收到甄先生早前繳付的服務費後，已隨即安排寄出換領信，甄先生現與產品供應商商討送貨安排。該公司為妥善解決事件，將通知供應商盡快聯絡甄先生跟進。
根據紀錄顯示，鍾小姐登記時曾選擇MP3機為禮品，惟其後卻顯示她改選冷氣機。香港寬頻作出調查後，相信事件涉及溝通誤會，該公司除致電鍾小姐致歉外，亦會替她更正禮品為MP3機。（○七○五○四五）、（○七○五○四六）、（○七二七一一九）
消費者委員會發言人蘇偉生表示，若用戶登記服務後，超過兩個月仍未獲取電器贈品，已超出合理時間。他稱，「相信唔少消費者係因為佢哋『送電器』呢個優惠先至選擇用佢哋嘅服務，如果佢哋遲遲未能答到幾時送出電器，可以聯絡我哋消委會跟進。」
服務熱線
電話：29908288
傳真：23702192
電郵：
香港寬頻推出送電器優惠，有讀者指簽約後仍未獲贈電器。
資料圖片
資料圖片