改裝車:
Audi改車王道出歐洲車改裝秘技
喺香港改裝歐洲車並唔係一件易事,除咗零件較貴之外,更講究其改裝技術,配搭要恰到好處,才能發揮歐洲車嘅格鬥一面。當中數一數二嘅本地歐洲車改裝商,相信呢位Audi(奧迪)改車王––Tony都可算係城中熱話;十多年來由佢改裝嘅歐洲車多不勝數,行街睇得之餘,更可以落場作賽㖭。今次我哋搵嚟呢位Audi改車王,為大家道出歐洲車嘅改裝秘技。
記者、攝影:黃凱穎
車輛提供:TWAutosport(21420001)
Audi改車王有心得
改裝歐洲車要講求零件配合,並唔係換上至Top最勁嘅零件就可以。然而,我哋所見Tony改裝嘅歐洲車,大多數都擁有超激嘅18吋胎軨,AP大口徑制動器等等,可謂非常吸引。而每年Tony都有四個多月唔喺香港,皆因要遠赴歐洲唔同嘅改裝廠上堂,學習各種配件嘅改裝技術,所以在汽車改裝上會有良好嘅配合,就連汽車代理亦對佢嘅改裝汽車有信心。歐洲車最難係其電腦程式嘅發展配合,以奧迪為例,就算一月生產嘅A4同四月生產嘅A4,其行車電腦已經完全唔同,如果改裝時未有注意到的話,除咗發揮唔到改裝零件嘅性能外,可能重要比原裝車更差㖭。
代理肯維修嘅改裝車
汽車代理一向最怕改裝車,因為汽車經大幅度改動後,會有機會出現不同嘅毛病,惟獨是Tony所改裝嘅Audi車,就算有較大嘅改動,代理都無問題,一於維修照舊。而部分經佢手嘅改裝車,更係應代理要求合作而成。而Tony被一眾奧迪車主封為Audi改車王,並唔係話佢老態龍鍾,而係暗指佢有十多年改裝歐洲車嘅經驗啫!Tony多年前開設第一間歐洲車專門改裝公司,同時又成立TWAutosport,以MarketRetail開銷其他品牌嘅改裝車店;Tony認為十多年前,AMG等改裝公司可以獨立經營,香港亦有一定水準,又點會做唔到,因而就開始咗佢個人嘅改裝事業。
改裝電腦增馬力
而喺大家眼前呢部TTCoupe,係我哋所試過最辣嘅一部,主要改裝只係電腦、懸掛、胎軨同放氣Valve等部件,但輸出已高達280匹,呢個已係歐洲標準嘅輸出極限。而此車又換上Wetterauer嘅電腦晶片,馬力輸出高達280匹;另外,Tony話佢哋經已用上Internet,連接到改裝車廠嘅電腦,下載最新嘅行車電腦程式,然後再將程式載入車上,咁樣除咗免卻裝拆嘅時間外,亦可隨時更新電腦版本。
而喺奧迪車上安裝TurboTimer,絕對唔係一件易事,因為普通嘅TurboTimer並不對應奧迪嘅行車電腦,有時會失去自動熄車功能。不過Tony就找出一套安裝TurboTimer嘅秘方,令TurboTimer和電腦接上,並可沿用各種功能。
Supersprint製排氣喉經驗夠
Supersprint係意大利品牌,並已有五十多年製造排氣系統技術嘅經驗,好多一級方程式車隊都會搵Supersprint研製其賽車嘅排氣系統,加上廠方每生產一個型號嘅排氣系統時,都會找來該型號嘅車,喺馬力機上不停測試,喉管每次以2mm增大,務求找出最佳嘅行車表現。
另外,歐洲車所用嘅放氣Valve聲量並不大,但聲效則頗為特別;當洩壓時會發出一連串「吱吱」聲,加上奧迪嘅Valve位置喺引擎後方,安裝時非常講技巧㗎。
車廂依舊散發誘人魅力
由於改裝部分只係集中於機械及車身上,故此車內並無進行大事改裝,各項設備如承托力極高嘅真皮桶形跑車座椅、設備齊全嘅中控台,以及簡潔嘅表板布局等等,全都被保留下來,並散發出陣陣誘人嘅魅力㖭。
KW懸掛予人信心
呢部TTCoupe嘅輪跨距離只有一隻手指位,就算任何路面情況,都唔會有碰沙板嘅問題。Tony笑說這就是配合,只要有適當嘅懸掛調校,車身怎樣低都無撞沙板,而TTCoupe所用嘅KW懸掛,係由KW同Koni合作設計生產,其雙筒式吸震筒,令TTCoupe有強大抗傾力之餘,又有舒適行街嘅特性;唔講唔知,原來TTCoupe喺珠海賽車場時,只係用上一般行街用嘅DunlopSP9000輪胎,配合埋KW懸掛,就可以將其性能發揮得淋漓盡致。
而呢部TTCoupe所用嘅呢套18吋胎軨,經已要過萬港元,要改用咁巨型嘅胎軨,要注意部車本身嘅Offset位,又要講求懸掛行程配合,才有良好嘅行車效果;呢類胎軨嘅重量極低但剛性強,可以抵受高速過彎嘅強大橫向力。
Audi耐用度最高
Tony認為現時德國車之中,以奧迪嘅耐用度最高,而且行車電腦同電子部件,都係德國車中最先進,改裝潛力亦最大,就好似前驅版嘅TTCoupe1.8Turbo引擎,只需經過電腦改裝設定,就可以由百多匹提升至220匹馬力。其實引擎本身跟原來四驅版一樣,只係電腦把空氣燃油比例改變,令引擎輸出降低;所以只需換上特別嘅電腦晶片,就可以將馬力提升。