未講今期心水之前，想先講吓充足的思想準備有幾重要。當年我有份踢的港聯，之所以經常爆冷擊敗到訪的世界級強隊，全因我哋夠集中、夠團結；再加上對手成日抱住「來港旅遊」的心態，以為「好易食」，當發覺港聯有番咁上下實力，想發力都為時已晚。
講咁多「想當年」都係為咗講隊利物浦，佢哋喺上周六身在雷丁，但結果輸1:3，不過當睇見紅軍落後，領隊賓尼廸斯換走主力球員，就知道佢個心已飛咗去馬賽，準備今日對歐聯作客馬賽決生死。紅軍既唔想睇住晉身16強的1,600萬鎊獎金白白溜走，球員更唔想錯失爭標機遇，故今次要破例，睇好利物浦可勝馬賽。
英聯盃8強韋斯咸鬥愛華頓，兩隊半斤八両；前者主場優勢不明顯，故我捧客隊，加上比韋斯咸多一日休息，晉級條件比大鎚仔佔優。今次簡單一注捧紅軍過愛華頓贏波，投注500分，上次蝕1,600分，累計結餘87,983分。