可能好多人都唔知，原來投資基金都有正邪之分，「道德基金」主要投資喺注重環保、社會責任或者企業管治嘅公司；「邪惡基金」就主要買入賭博、軍火、煙酒等行業嘅股份。
mapnerd喺《MSN討論區》話：「隨着全球暖化，環保行業越嚟越吃香，加上支持環保，所以我會買環保股、綠色基金等投資產品。呢類公司對社會有好大貢獻，我揸住呢類股份，會瞓得好安樂。」
chihyi批評：「有啲所謂道德基金，其實同邪惡基金差唔多，例如部份國家為咗生產綠色能源，不惜大量砍伐樹木，將塊地用嚟種玉米，製造乙醇之類嘅替代能源，破壞雨林，一啲都唔環保！」

邪惡基金抗跌力強

kageyama話：「越邪惡嘅嘢通常越賺錢，所以我寧願買邪惡基金。」基金經理艾倫斯（DanAhrens）講：「就算經濟不景，一般人亦好難放棄食煙、飲酒、賭錢等壞習慣，所以呢類股份喺經濟衰退時，仍然有『抗跌力』。」
不過，理柏（Lipper）研究經理馮志源話：「道德基金回報未必差過邪惡基金，喺全球暖化嘅趨勢下，好多投資替代能源嘅基金不斷成立，其中KBC生態基金（全球替代能源基金）今年嚟有25.9%投資回報，仲勁過唔少邪惡基金。」