人哋話，只要有恆心，鐵柱磨成針。不過，呢個絕對唔Apply喺香港上車呢件事上。今次辣招，未上車嘅當然慘，但講到最慘嘅，一定係以下呢班：

「Honey，我哋過幾個月，應該就可以儲夠首期，之後就可以結婚。」呢一日，我心情非常愉快，因為只要多幾個月，我終於可以同依家望住我嘅阿怡組織家庭。「咁到時就可以組織一個屬於我哋嘅小天地啦，我哋係咪應該開始睇定裝修呢…」呢一個Moment，我終於知道，財爺所講嘅「心中富有」，其實係要建基於「上車希望」。

不過，天意弄人！今日，政府公佈：七百萬或以下樓　按揭降至六成

天呀！你係咪要玩死我！我辛苦咗咁耐，就來行到層樓門口，條匙都就掂到。點知，佢「蕉」一聲，突然彈遠咗。就好似你跑長跑，條終點線明明差十步就到，真係差十步、九步、八步……我頂！你竟然將條終點線突然褪後！你玩晒啦，政府係咪搬龍門搬上癮？

冇錯，細價樓越炒越貴問題要解決，但你要降低需求，點解要向我哋呢啲最慘嗰班開刀。咁同喺大飢荒時屠殺一班災民，去解決飢荒問題有咩分別？

呢一日，我再搵呀怡，我唔想面對，但都要面對，「阿怡，我哋又要儲多排錢先買到樓呀，對唔住。」「傻瓜，唔好儲啦，你儲得來，樓價又高咗。反正依家樓價癲到咁，你唔係仲同佢癲呀嘛？點追？不如我哋拎舊錢去旅行，去享受人生好過啦。」

聽到佢咁講，「你唔係仲同佢癲呀嘛？」呢句一直喺我個腦到轉。係囉，點解我要咁辛苦，就係為咗一疊豆膶咁細嘅樓。加辣後，租金一定升，學大陸Tone，劏房會成為「新常態」。我份糧都冇雙糧，綜緩就三糧，咩世界？唔怪得有人話辭工食綜緩好過啦！

一世人流流長，點解要辛苦多年為做樓奴，係咪傻既。你話世界上，邊有人會俾錢去做奴隸呀，所以我決定，放棄！

加入自暴自棄協會，成為會員！

突然，我醒起一件事，之前CY話，要「解決青年的住屋問題」。依家，我真係明了，佢真係解決到！因為我已放棄去諗呢個問題，CY，你終於有政績了！

by千頌C@堆填區
http://fb.com/winbigwok