繼秋官效應、光銀上市及稻香一蚊雞後，港股又多一個死穴，講緊嘅係神舟太空船！

返回地球日　見底回升時

恒指周二埋單跌260點，創今年新低，咁啱內地神舟十號太空船同日升空，睇番過往紀錄，由神舟一號計起，撇除兩次係星期六股市休市外，其餘八次升空日，港股跌足七次，跌市比例高達88%，同太空船越升越有嘅表現，完全係南轅北轍。

要數最誇張嗰次，就不得不提2011年11月1日，神八升空日，當日港股可謂四面楚歌︰歐豬國希臘正就歐盟援助方案進行公投，債務違約危機一觸即發；內地製造業PMI數據跌至50.4，衰退陰霾籠罩，加上美國期貨券商明富環球申請破產保護，拖累恒指單日狂瀉494點，險守萬九點關口，淡友身家就升到神八咁高，可憐好友全部喺地下得個望字。
不過，如果計埋港股喺太空船整個旅程嘅表現，九次入面（有一次休市）升跌參半，意味太空船返回地球時，大市都有見底回升迹象，好似2002年神舟三號及四號升空當日，港股分別跌0.3%及1.8%，但旅程結束時，已齊齊倒升1.6%及1.5%。照咁睇嚟，除咗中共領導人同埋內地航天專家外，香港股民都好希望神舟十號快啲安全歸來囉。

李華華
mailto:[email protected]